中環出更：晚宴大玩華夏文化 帝王妃嬪滿場飛
香港壽臣山獅子會早前舉行創會十周年慶典，一向醉心中華文化嘅大會主席李文偉（Gary）搞搞新意思，大玩「華夏之夜」服飾主題，一眾賓客玩興大發，橫跨幾個朝代嘅帝王將相、皇后嬪妃空群而出，連包青天、電影中嘅主角書生寧采臣都嚟趁熱鬧，氣氛即搞笑又歡樂。
Gary笑稱自己扮秦始皇，呢一身裝扮用咗大約兩小時，最費時係整頭套，反而着龍袍就好易。見佢戴着前後都有垂珠嘅頭冠，想擰頭轉身都頗唔自在，難怪金銀業貿易場理事長張德熙笑笑口話，好彩自己唔係生在古代，否則戴住咁嘅頭冠，晚晚做兩小時頸部按摩都唔掂喎。
文錦歡飛天綵帶舞贏盡掌聲
現場仲有好多皇后，包括Gary太太兼壽臣山獅子會創會會長嚴偉貞，國際獅子總會前國際理事文錦歡就扮楊貴妃，個個扮嘢好認真，絕不欺場。文錦歡盛讚晚宴主題玩復興中華文化，好有意義，當晚佢仲獻跳飛天綵帶舞，贏得滿場掌聲。但原來佢跳呢段舞係速成班，跳得好全靠平時跳開舞，身段同底子好咋！
紅山獅子會前會長蔡輝雄（Joe）就扮包青天，佢笑稱扮包大人係因為要宣揚正義，仲話包大人同佢似似哋，一樣咁正直喎。中國港澳三○三區總監陳立德、前總監羅少雄都有到場，但佢哋就好hea，扮現代人。羅少雄話現時獅子會喺香港共有九十個分會，每年增長大約十個。咁多分會提供咁多服務，所以活動形式要講創新及新意，一啲都唔容易o架！
卓妮