棟篤笑藝人開騷，觸發一場關於炒黃牛飛嘅全城大辯論，有人建議引入「實名制」，門票冇得轉讓，問題係飛就係得咁多，始終滿足唔晒粉絲需求。其實房屋問題都係一樣，麵包就係得咁細，僧多粥少唔夠分咯喎，就算點樣喺分配方法上做文章都係嘥氣！
呢嗱，新一期居屋日前截止申請，結果收到三十幾倍超額申請，唔少申請者表示，連東涌單位都照殺。鬼咩，今時今日上樓難，私樓價格高處未算高，對好多人嚟講，居屋係置業嘅唯一可能，唔爭崩頭至奇。今次超額三十幾倍唔算誇張咯，之前五十幾倍都試過，有人形容抽中居屋仲難過中六合彩，真係冇誇張o架！
面對居屋供不應求，有立法會議員建議進一步加大非公屋居民嘅白表比例，認為過往有近八成申請係白表，反映房屋自住需求大，話房委會應該盡快開會研究調整綠白表比例咁話。
哈，睇怕呢位尊貴議員梗係未聽過「朝三暮四，朝四暮三」嘅故事嘞，無論綠白表比例係依家嘅「五五分」又好，抑或「四六分」都好，始終都係有人歡喜有人愁，「中獎」嘅固然興高采烈，向隅者實會諗一日最衰都係改制，到頭嚟順得哥情失嫂意不特止，仲可能增添怨氣，弄巧成拙。
冇錯，企喺白表申請者角度睇，綠表人士有個公屋竇口已經好幸福，好心唔好再走出嚟同人爭喇；掉番轉綠表人士又可能諗，居屋原本就係置業「升呢」嘅階梯，入紙申請天經地義，更何況部分公屋申請者可能係富戶，面對迫遷壓力，唔提早置業嘅話，容乜易街都有得瞓o架。而從整體社會資源分配角度出發，公屋單位流轉得慢，基層無殼蝸牛怨氣只會愈來愈重。你哋話嘞，咁搞法除咗令社會更加分化，階級矛盾更加激烈，仲有咩好處吖！
議員獻計政府受唔受，仲要睇過至知，但官老爺自己冇做好份工就推卸責任，挑動群眾鬥群眾，卻珍珠都冇咁真。家陣公屋上樓條隊長過萬里長城，之前有市民忍無可忍，入稟法院申請司法覆核，挑戰房委會新修訂嘅公屋配額及計分制年齡歧視，對非長者單身人士唔公平。房委會居然靠嚇，話如果敗訴，平均輪候時間勢必超過八年，潛台詞即係有人搞事，上唔到樓嘅唔該搵佢哋算帳。
正所謂冤有頭，債有主，市民安居難過登天，講到尾都係港產官僚無能惹的禍，開口埋口「房屋問題重中之重」，可惜講就天下無敵，做就無能為力，千千萬萬無殼蝸牛與其互相指摘，不如團結一致，踩上禮賓府紮營好過！