政情：容海恩「失蹤」 議案極速辯論完
立法會議員鄭松泰喺舊年提交立法會大會嘅「設立警員操守資料庫」無法律約束力議案，等咗半年終於排到尋日喺大會上辯論，但議案只花咗個多小時就極速完成辯論兼表決。點解立法會突然咁高效率？原來係一班議員唔專心開會，就連原本已撳咗發言掣要求就議案發言嘅議員都冇坐定定喺會議廳。主席梁君彥見會議廳內已經冇人發言，惟有進入表決程序。究竟邊個撳咗發言掣又走咗去？原來係議員容海恩（Eunice）喇！
鄭松泰喺議案表決後就話，明明眼見有九個議員排隊等候發言，點知喺金融服務界張華峰發言後，排喺之後嘅Eunice就唔見咗，而Eunice之後嘅議員亦唔喺座位，搞到冇人發言，要進行表決。佢又話當時有建制派知道甩咗轆，又驚唔夠法定人數，曾一度要求佢唔好記名表決，但就畀佢拒絕咗。
掛住開會冇為意
究竟Eunice去咗邊？佢話本身喺立法會大樓，已寫好講稿表揚警隊，但因為喺議員辦公室同歐盟嘅人員開會，所以冇為意會議廳情況︰「我諗住遲咗咪之後輪過，點知冇咗之後」，佢又話好彩個議案被否決咗，唔係好大影響。
而排喺Eunice之後發言嘅議員葛珮帆就大嗌「好嬲」，佢話講稿都寫好，喺張華峰發言時見到Eunice同議員林卓廷都排喺自己前面，計落每人七分鐘發言時間，都有二十分鐘先到自己，所以就去咗洗手間，點知喺洗手間出嚟，已經到鄭松泰就議案作總結發言，佢就冇份講喇，真係激死咁話。