政情：DQ周庭開支要幾多？ 補選外判法律意見23萬
喺上月立法會四席補選，香港眾志常委周庭、沙田區議員陳國強同本土派劉頴匡因「自決」立場被DQ，即取消參選資格，律政司律務專員蕭如彬回覆議員預算案書面問題，披露律政司曾就立法會補選尋求律政司以外專家嘅法律意見，有關外判開支共涉及約二十三萬元。
專家身份獲同意先可披露
蕭如彬又話由於受到《個人資料（私隱）條例》（第486章）限制披露資料嘅規定，律政司唔能夠喺未取得個別意見提供者嘅訂明意見外，披露嗰啲專家嘅身份。
另外，有議員關注，律政司就前年立法會換屆選舉同今年立法會補選中有意參選人士嘅參選資格，向選舉主任提供法律意見時有冇委聘私人執業大律師或律師，如有涉及多少費用，律政司承認曾就問題所指嘅事宜尋求律政司以外專家法律意見，共涉及約一百四十四萬元外判開支。