政情：倒轉招牌 中西區會「造反」
有人鍾意將「福」字揮春上下倒轉貼，寓意「福到」，但將自己招牌倒轉又係乜嘢玩法？民主黨中西區社區主任張啟昕近日喺西環山市街、近桃李臺同青蓮臺附近，發現一個花槽上嘅「中西區區議會」金屬牌倒轉安放，下方嘅政務總署牌就冇出錯。佢笑言係咪代表中西區區議會「造反了」？
睇過嗰塊倒掛金屬牌上嘅四粒螺絲已經生銹，估計已安裝咗一段時間，亦即係話都錯咗好一段時間，但因嗰度較為偏僻而遲遲未有人發現。
將通知民政處糾正
張啟昕話暫時未見附近出現同類情況，稍後會通知民政事務處盡快糾正，並希望相關部門日後喺完成工程後仔細驗收，以免市民覺得政府處事「是是但但」。