政情：陳茂波開空頭支票 預留撥款「齋擺」

近十年庫房水浸嚴重，財政預算案亦開始出現一筆叫「預留撥款」嘅開支，扣起一筆公帑預留為某個項目使用，亦即係官員口中成日講嘅投資未來。不過，立法會秘書處資料研究組最新嘅研究簡報就踢爆，呢啲預留撥款只係「預留」，唔少原來係空頭支票用唔到。例如港府喺○八/○九年預留五百億元做醫療改革，但截至上月底，只使咗當中約一百四十億元，即係差唔多整整十年只係用得總額嘅兩成八。又例如上個年度為教育事宜預留咗一百八十七億元，又預留一百億元大搞支援創新科技發展，但係埋單計數，兩者已申請撥款分別只佔總數嘅一成九同約半成，即係絕大部分款額只係得個「擺」字。

預留款項使用率奇低已經夠離譜，港府喺一六/一七年預留咗四百五十億元做房屋儲備基金，聲稱要配合推行十年公營房屋供應目標，但點知房委會喺財政上未見壓力，仲講明未來五年都毋須靠呢個基金提供支援，換言之呢筆公帑只係「為留而留」。另外，港府喺同年注資二千二百億元成立未來基金，話要應付未來十年可能出現嘅結構性赤字，不過即使根據港府自己嘅保守預測，直至二二/二三年度庫房每年都會錄得盈餘，當局對赤字嘅擔心短期內根本唔會出現，結果呢二千幾億元隨時又得個「擺」字。

似扣起公帑免水浸 多於投資

波叔今年留起咗成近三千九百億元做預留撥款畀十四個項目，而當中三千億元係畀第二個十年醫院發展計劃。不過睇番第一個十年計劃預留嘅二千億元，至今只批出咗八十四億元，只佔總額嘅都唔夠半成。波叔口口聲聲話預算案要着重投資未來，但係客觀數字證明呢啲預留撥款係咪用到都成問題，難怪坊間質疑波叔今年只係重施故技，再用預留撥款為藉口，扣起啲公帑避免庫房水浸過頭嘞！