中環出更：傳細寫畀房署彈票 議員副局齊測試
新一期居屋前日截止，房屋署累計收到逾十四萬份申請表，而早排有傳市民如果填寫支票嘅時候，以「細寫中文」填銀碼就會被DQ，搞到人心惶惶！卓妮同幾位立法會議員向一位副局長講開呢件事，佢哋仲即場做咗個測試，試吓申請居屋交行政費，用中文大寫寫「二百四十元」，睇吓寫得啱唔啱？
所謂「大寫」同「細寫」，即係「貳佰肆拾元」和「二百四十元」，一般銀行都鼓勵市民用大寫避免畀人改面額，但有指只要中文寫法同阿拉伯數字一樣，都可以入票。
莫乃光呻英文易好多
勞工及福利局副局長徐英偉（Caspar）率先試寫，佢話平時用開英文，諗諗吓寫出「二佰四十元」，Caspar又拉埋資訊及科技界議員莫乃光（Charles）一齊試，Charles就寫出「二百四十元」。當兩人知道正確寫法時，Caspar立即笑稱，以自己小五程度嘅中文，能夠寫到「佰」已經好叻，Charles就呻大寫太難寫，寫英文容易好多。
另一名議員梁美芬（Priscilla）都試寫，就只有「貳」字寫法有些少唔同，佢笑稱係靠印象寫。佢嘅助理就建議日後用中文開支票出糧當練習，Priscilla話都可以喎。
而體育、演藝、文化及出版界議員馬逢國係模範生寫啱晒，佢話平時寫支票有時用中文，有時用英文，戲言係按唔同國家嘅銀行嚟分別，就算被彈票都係因為大頭蝦寫錯日期。工聯會嘅郭偉强亦係模範生，佢邊寫邊好自豪咁話「我平時就用開中文寫」，一啲都冇難度，唔理解點解會唔識用大寫。
卓妮