正如管理學著名嘅「梅菲定律」所講：凡是有可能出錯，就會出錯。所以呢，「關愛座」都會變「批鬥座」，明明原意係鼓勵人讓座，結果惹來不少非議，甚至變成市民初則口角、繼而動武嘅導火線，簡直冇眼睇。
呢，前幾日又有市民喺巴士上面為爭奪關愛座而大打出手，事關有年輕人霸住個關愛座，死都唔肯讓畀長者，雙方一言不合，拳頭相向，仲打到血流披面、被警方拘捕添，唔怪得有人話港鐵、巴士設立關愛座，真係好心做壞事。講真，鼓勵乘客讓座畀有需要人士，出發點係好，但唔少乘客都覺得自己都有畀車錢，返咗成日工夠攰咯，而且讓係人情，唔讓亦係道理，強行要求讓座都係一種歧視。如果要求讓座嘅人態度唔好，咪搞到打輸去醫院，打贏上差館，都唔願意讓個座位出嚟。
睇到喇，關愛呢個詞本來係好嘅，關心愛護弱勢同埋有需要嘅人群吖嘛，弘揚文明禮貌吖嘛，但做起上嚟現實同理想就有好大出入。就好似政府嘅關愛基金都係o架，醫療、教育、房屋、福利、民政瓣瓣都插隻手落去，諗住支援兒童、老人家、殘疾人士、病人、新來港人士同少數族裔，想頭就大喇，但實際上掛「關愛」嘅羊頭，賣「虐待」嘅狗肉嗰度弊呢。
唔使講咩，唔少罕見病患者都話關愛基金幫唔到佢哋，鬧爆呢個政府制度僵化，令佢哋未被納入合資格購買價錢極度昂貴藥物嘅資助名單，雖然有啲罕見病二百個患者一年嘅藥費要接近五千萬大元非常乸脷，但政府搞不斷超支嘅大白象工程都使成百億，冇心關愛嘅就唔好開個牌頭話資助病人買不常見疾病藥物啦。
講到冇心冇肺，關愛基金對兒童都算偽善囉，話就話向清貧學生提供經濟資助，但全港有二十三萬貧困兒童，唔少都係家住劏房，雞碎咁多嘅資助款額都唔足以應付教育使費，等住政府關愛喎，蚊都瞓蛇都死喇。
關愛基金對住啲老人一樣咁孤寒咋，搞埋啲睇牙計劃，門檻定到高一高，七十歲至受理申請呢一筆唔講，最弊係長者牙科服務長期供不應求，結果就真係牙痛咁聲嘞。再講吖，公營安老院舍僧多粥少，上年度就有超過六千幾個老人家等唔到宿位就離世，但關愛基金唔去改善呢個情況，美其名曰鼓勵居家安老，實情係縮骨啫。
都係嗰句喇，關愛基金雷聲大雨點小，造糖不甜，造鹽不鹹，基層受惠極之有限，更有唔少真正需要關愛嘅窮人匿喺陽光照射唔到嘅角落，咁嘅「關愛共享」，擺明就係嘥氣。