政情：八網難逃：澳洲學塗鴉 林琳齋填色
身兼行政會議成員嘅立法會議員張國鈞，佢喺中西區嘅議員地區辦事處大閘被塗鴉，原來荃灣區議員林琳都玩過，但唔係喺香港，而係喺澳洲，仲係一日貨仔咁多喇！
林琳喺Facebook 上載咗張相，喺佢舊年去澳洲參加一日遊嘅團，跟新西蘭嘅藝術家學塗鴉，而喺佢後面大閘嗰幅圖，就係佢嘅傑作，亦係佢嘅英文名Nixie，但構圖唔係佢，佢只係負責填色啫，但就已經覺得好好玩。
畫前要同業主傾好
當地政府亦都有推動塗鴉文化。林琳話悉尼政府有開放部分滑板公園畀人公開練習塗鴉，而好似佢有份填色嗰幅畫喺私人地方，事先要同業主傾好，而行內亦有分黨派，大家有自知之明，唔會畫得差嘅人去覆蓋勁人嘅畫，而但凡見到任何紀念去世親友嘅畫作，會加一支白色蠟燭，大家都知道尊重去世的人而唔會覆蓋佢o架！
講到出路，佢話因為澳洲有好多地舖咖啡室等等嘅舖頭經常都會邀請唔同嘅藝人過去設計廣告牆壁，所以收入都唔錯喎。