政情：江明熙提倡「七無」可持續膳食
想保持健康必須從飲食着手。香港醫療專業人士協會創會主席江明熙話，濫用科技手段嘅工業化糧食生產，既損害環境又不利健康，所以佢打算提倡不經基因改造，不含農藥同化學品，無賀爾蒙無催生激素，亦無殺蟲劑與防腐劑等「七無」嘅可持續膳食，期望大家食得自然兼可持續健康。
驟耳聽來，可持續膳食係近年興起嘅新概念，但江明熙話人類糧食本來就係「七無」，只係幾十年來農業同養殖都邁向工業化，糧食產量無疑係多咗，但產品質素不斷下降，就連「食雞要有雞味」咁起碼嘅要求亦成奢談，長遠而言亦對健康構成顧慮。
打算由食肆開展
要推廣可持續飲食，佢打算由食肆開始，初期建議餐牌上至少有一道菜式係採用 「七無」嘅食材。 雖然 「七無」食材價格較高，但只要得到大眾接受，自然會增加供應從而拉低售價，如瑞典推行可持續膳食之初，價錢比一般食材貴咗四分之一，但半年後只較工業化食材貴半成。佢又話本地亦有農夫從事「七無」耕作，且注重健康同環保嘅港人亦唔少，因此香港係有條件將可持續膳食普及化。