政情：胡志偉政治爭議纏身傳棄選區會
民主黨（白鴿黨）主席胡志偉身兼黃大仙區議會同立法會議員，三重身份已分身不暇，再加上早前爆出「佔中特赦論」，今年再收特首林鄭月娥三萬元捐款惹起極大爭議，對明年區議會同二○二○年立法會換屆選舉都存在隱憂。有傳胡志偉做埋今屆立法會就淡出，但區內嘅乳鴿未可接棒，加上民協前主席莫嘉嫻喺舊年年尾轉會，有需要為佢謀個好位，近日就盛傳胡志偉正鋪路逐步交棒畀莫嘉嫻，率先棄選黃大仙瓊富選區。
據了解，負責民主派協調嘅民主動力喺舊年九月已完成區議會選舉初步協調，至今仍為各方進行磨合。唔少準參選人已喺地區打正旗號，為參選下屆區議會選舉做地區工作。據悉，白鴿黨初步有逾百人可能參選，最終確實數字則未定。而莫嘉嫻喺舊年六月退出民協，經過幾個月過冷河，至年底十一月正式過檔白鴿黨，及後數個月來仍經常現身原來九西馬頭圍選區工作，對二○一九年嘅選舉態度曖昧。
或交棒畀莫嘉嫻
莫嘉嫻現時喺胡志偉辦事處任社區幹事，胡志偉大部分嘅易拉架同單張都印有兩個人嘅肖像，呢幾個月嚟亦有密密行孖咇落區，而且幾乎所有白鴿黨大事都會見到莫嘉嫻嘅身影，惹人猜疑胡志偉係咪有心讓位畀莫嘉嫻。有知情人士透露，莫嘉嫻曾經同老公商討係咪再戰馬頭圍，但佢老公就覺得既然已經轉會，如果再繼續同一區或可能搣唔甩民協嘅形象，所以建議佢轉區再選。有泛民中人就話，莫嘉嫻已揀定一九年嘅選區，但遲遲未有公布，連對部分泛民好友亦三緘其口。
泛民圈子近來盛傳，莫嘉嫻將會出戰胡志偉現時嘅瓊富選區，胡志偉或會再選一屆立法會後，喺二○二四年為莫嘉嫻抬轎，送佢入立法會。可惜有唔少人都擔心，喺咁短時間內莫嘉嫻係咪可以接手胡志偉一切，估計呢個亦係莫嘉嫻至今仍未對外公布選區嘅原因。
莫嘉嫻回應查詢時就確認唔會再競逐馬頭圍嘅席位，亦已揀定另一選區，但暫時未可公布，而胡志偉就話「一切正在進行中」，會唔會再選區議會則未有正面回應。空穴來風未必無因，能否成功過票、過位，仍屬觀望階段。