中環出更：黃家和吳國安交通不便焗買黃牛
近排黃牛飛問題再成為全城熱話，大家都好嬲點解黃牛黨好似冇規管咁。香港中華廠商聯合會（廠商會）早前舉辦《行業「商‧對論」》嘅晚宴時都講起黃牛飛，佢哋都話睇演唱會同表演一定唔會買，因為唔想助長黃牛黨，但兩名副會長吳國安同黃家和（Simon）就話，早年搭渡輪、火車比較困難，又趕住做嘢，試過焗住要買黃牛飛呀！
吳國安話以前渡輪座位較少，而去廣州嘅火車每日得四、五班，試過趕住做嘢買唔到飛，被迫畀多一倍價錢去買黃牛。Simon就話當年撲飛好難，自己排正規嘅隊不斷被人打尖，佢大鬧打尖嘅人，但有極大班人唔理佢繼續打尖，佢都冇辦法，當時又有急事要回港，惟有焗住買黃牛飛，早期喺內地試過用咗四、五倍嘅價錢去買添，不過當年一張飛都係十幾蚊啫！
演唱會炒飛 顏明潤拒幫襯
Simon講起，最近同工總主席郭振華（Jimmy）去柬埔寨同越南出trip，被對方傳染傷風，Jimmy喺行程最後一日已差唔多好番，佢就第三日開始發病。好朋友睇嚟連病菌都互相分享喎。
講番黃牛飛，常董顏明潤話近期炒飛炒到好嚴重，大呻難買飛，佢睇演唱會同表演最多試吓搵朋友攞飛，堅持唔會買黃牛，覺得咁樣唔正當，寧願買唔到就算。副會長徐晉暉都話炒飛問題好離譜，提起美國有著名歌手有個好方法，會計算購票人士係咪真歌迷，例如有冇喺社交網站追蹤歌手近況等，才會賣飛畀該人，雖然門票會賣得比較慢好多，但喺開騷前都可以賣得晒，就可以避免助長黃牛黨。
會長吳宏斌就話未做過黃牛飛苦主，因為佢唔係好熱衷演唱會等文娛表演，即使大型足球比賽，有啲人就會好想去睇，佢就唔想去現場睇咁逼嘞，寧願搵個舒服嘅地方，飲杯酒、食兩箸好餸好過。
卓妮