提起假難民同南亞兵團，香港人真係喊得一句句，佢哋唔止打劫、毆鬥、強姦、非禮樣樣齊，過去五年更使咗香港人近五十億元，真正好食好住好招待。反觀唔少香港人生活喺水深火熱之中，特衰政府就扮睇唔到，一味對禍港殃民嘅假難民大愛無疆，吹脹！
呢呢呢，「東方報業民意調查」顯示，受訪者一面倒痛斥南亞兵團嚴重威脅香港治安，特別係持行街紙嘅假難民干犯嚴重罪行人數節節上升，根本就係香港嘅治安毒瘤。咁又係呀，南亞兵團膽正命平，無論係出動鐵錘打劫珠寶店，定係陰陰濕濕從後扑頭搶嘢，抑或係推跌阿婆搶銀包，大小通殺，為咗錢乜都肯制，甚至斬埋雞頭，燒埋黃紙，勾結本地黑幫做世界添。好似尋日凌晨吖，又有市民喺深水埗被南亞兵團搶手機。睇到喇，香港已經變成無掩雞籠，恐怖分子、大賊小偷，通通嚟香港食大茶飯做世界，香港畀佢哋搞到雞毛鴨血，想唔變罪惡之城都難啦。
仲有喎，港府對呢班假難民照顧周到，唔止出錢出力幫佢哋打官司，等候聲請期間仲有人道津貼，萬一遇到仁慈法官，仲隨時博到大筆人道賠償添。有人計過，港府為咗呢班人所花嘅公帑足夠起七千個公屋單位，呢啲咪係善財難捨，冤枉甘心囉。咁好福利，咁大個水魚政府，南亞兵團梗係賴死唔走喇，仲要呼朋喚友偷渡來港添，到時你又聲請，佢又聲請，香港陸沉都似。反觀香港人就慘嘞，莫講話想申請政府援助諸多限制，唔少無殼蝸牛連片瓦遮頭都冇，搞到要瞓快餐店，港府眼尾都唔瞄一下，香港人嘅待遇連假難民都不如，唔谷氣就假咯。
嗱，咪以為最近積壓嘅酷刑聲請個案由過萬宗大減至四千幾宗就係好消息喎，實則九成聲請被拒嘅假難民都會提出上訴，咁又可以拖多幾年，搵多幾年快錢。好明顯喇，聲請機制已被嚴重濫用，變成假難民予取予求嘅提款機兼免死金牌。正如受訪市民話齋，唔該特衰政府咪再假仁假義，盡快退出《禁止酷刑公約》，最起碼要對犯法假難民即捕即解，或者重設禁閉營，否則南亞兵團自出自入，無法無天，香港遲早玩完o架咋。
都係嗰句喇，請鬼容易送鬼難。香港畀假難民搞到無日安寧，罪案無日無之，長爆長有，天堂都變地獄，唔怪得愈來愈多有錢佬用腳投票移民他方喇。咪話功夫茶唔提醒，特衰政府一味中門大開，司法一味慈悲為懷，治安毒瘤好快就會變成治安癌症，到時先至後悔已經太遲！