政情：冇飛睇電競賽 羅冠聰遇黃牛？
近年「黃牛黨」猖獗，唔少演唱會門票一票難求。被取消立法會議員資格（DQ）嘅香港眾志主席羅冠聰近日到德國柏林，打算觀賞電競比賽，誰知飛已賣晒，當佢去比賽場地外諗住博下有冇人退票時，竟有人上前問佢要唔要飛，唔通佢遇到黃牛黨？
有「電競聰」之稱嘅羅冠聰，以前曾擔任電子競技比賽評述員，日前佢喺Facebook貼文，指有朋友提醒佢柏林有電競比賽，令佢可以完成親睹賽事嘅心願，佢隨即到官方網站購買門票，但可惜已售罄，惟有到現場等待替補門票。
電競隊負責人送飛
喺等候期間，突然有人問佢要唔要飛，唔通遇到黃牛黨？咁又唔係，其實係遇到好心人，對方自稱係電競隊伍嘅負責人，登時令羅冠聰嚇咗一跳。原來對方多咗兩張飛，所以問佢要唔要啫！佢主動表示畀番錢，但對方拒收。