政情：鄭松泰拒入 議會陣線做泛民大佬夢碎

議會陣線最初只有四名議員，包括街工梁耀忠、人民力量陳志全、自決派朱凱廸，以及香港本土嘅毛孟靜，而毛孟靜則暫時係議會陣線召集人。據聞，毛孟靜喺補選前後，都有搵過鄭松泰傾過入組，而鄭松泰回應時承認毛孟靜有邀請佢，分別加入泛民Whatsapp群組同埋議會陣線，但佢就拒絕晒。

「泛民內部冇信任」 合作寧「鋪鋪清」

鄭松泰解釋，話泛民內部本身都冇信任，擔心自己加入會令情況更差。至於議會陣線，佢就話其實依家佢哋係「鋪鋪清」，即係每個議題都會傾下立場，相近先會有合作。佢仲話因為大家立場同政治綱領都唔同，加上「鋪鋪清」呢種模式幾好，所以都唔打算加入議會陣線。

就因為鄭松泰拒絕加盟，議會陣線當然冇可能做到泛民大佬喇！再講，鄭松泰指泛民內部本身冇信任，呢個亦係事實喎。近年泛民再細分為溫和派同激進派，而當中啲矛盾就愈嚟愈明顯，繼上年年尾嘅施政報告致謝議案之後，喺早排財政預算案派錢問題上亦曾經出現意見不一嘅情況，再加埋之前立法會補選泛民主派初選又出現「屈基（逼退民協馮檢基）」事件，好明顯泛民內部本身都鬼打鬼。

除咗內亂，議會陣線嘅成員本身都問題多多。曾經係公民黨成員嘅毛孟靜，鬧出車房變住宅，拖足八年未還原嘅醜聞，以及同黨友「貌合神離」，仲要拖足六年先退黨。而街工嘅梁耀忠喺今屆立法會第一次會議做代主席時，就因為臨陣縮沙，畀人笑佢做逃兵。至於「屈基」事件嘅另一主角、自決派嘅朱凱廸，除咗「屈基」，仲試過喺立法會入面使出「怪招」，要求新聞界同公眾人士喺會議期間離場，搞到成為眾矢之的。無論泛民又好，定係議會陣線又好，都咁立立亂，黐埋去盞攞嚟衰，都係保持距離好啲。