中環出更：傳張秀賢做范國威議助 被指初選設局
話說喺立法會四席補選前，民主派為免互相「 （界刂）票」分薄票源搞咗一場初選，結果競逐代表出選新界嘅中大學生會前會長張秀賢落敗，由新同盟嘅前議員范國威代表出選，而范亦已喺補選勝出且宣誓就任，但初選竟然餘波未了。被取消參選資格（DQ）嘅沙田區議員陳國強尋日喺Facebook爆料，話張秀賢做咗范國威嘅議員助理，直斥初選係一個局。真有此事？
查番資料，范國威喺初選贏咗之後，張秀賢都曾經幫佢站台，而范國威過往亦曾喺電視節目上表示會考慮聘請張秀賢出任助理，咁睇陳國強尋日喺Fb嘅講法，都可謂空穴來風，未必無因。
商邀張任義務顧問
張秀賢回應有關消息真偽時不置可否，只係話「總之依家一定唔係佢（范國威）領薪嘅議助，未來有冇合作再睇。」但佢又話「今日係愚人節」，最後只係叫記者去問范國威。至於范國威回覆查詢時就話曾經同張秀賢商討，邀對方出任義務顧問，但暫未有結論。究竟係議員助理抑或係義務顧問？大家拭目以待喇！
卓妮