中環出更：復活節充電 張華峰澳洲歎海鮮
香港素來生活節奏急促，而正值難得嘅一連四日復活節期假，唔知香港人去邊度充電呢？立法會金融服務界議員張華峰（肥老闆）就去咗南半球，遠赴澳洲歎世界，仲話最近幾個月立法會已經重回正軌，工作量明顯增加番，所以就趁住復活節長假期，去澳洲充充電，仲喺Facebook貼文分享陽光與海灘，真係見到都覺得寫意啊！
肥老闆又點會淨係滿足於陽光與海灘，最重要當然係品嘗當地嘅肥美海鮮，睇肥老闆拎住隻龍蝦幾大隻，臂力少啲都拎唔起呀！仲有啲鮑魚仲大過隻手掌，真係睇吓都流晒口水。喺美食當前，肥老闆仍然心繫議會工作，佢話返港後會跟進同股不同權、大灣區發展呢啲議題。
容海恩學生look遊日睇金魚
相信肥老闆今趟旅程夠晒快活喇，唔知其他議員又去咗邊玩呢？新民黨議員容海恩（Eunice）去咗日本喎。佢喺Fb分享咗幾張喺日本博多「夜訪水族館」嘅相，可以睇到魚類喺夜晚活動時候嘅樣貌，Eunice亦都把握機會同成千上萬嘅金魚自拍合照。好多網友大讚好靚，但唔知係讚啲魚定係Eunice？有網友更話Eunice「個look太過同學feel」，唔通讚佢依然青春？
至於成日飛去內地搞農務生意嘅立法會前議員鍾樹根，直頭係生日撞正復活節假期，見佢去咗廣西玩之餘，成班朋友仲幫佢準備咗一個「性感內衣蛋糕」，外形認真盞鬼，樹根都直言「哈皮！哈皮！好哈皮！」（開心！開心！好開心！）睇嚟無論個蛋糕好唔好食，淨係靠個外表，鍾樹根都已經非常滿意喇！
卓妮