政情：公民講場：被轟派錢唔搞全民退保 徐英偉變代罪箭靶

新一份財政預算案遭各界狠批派糖不均，政府喺各界壓力下終「跪低」局部派錢，財政司司長陳茂波前日喺勞工及福利局局長羅致光陪同下，宣布向合資格市民派發四千元，不過政府由「唔派又派」，到選擇性派錢，繼續引起多方批評，撞正立法會退休保障事宜小組委員會尋日舉行公聽會，一批長者及關注團體代表齊聲鬧爆政府坐擁逾一千億元盈餘，寧願派錢都唔推行全民退休保障，咁啱公聽會唔見羅致光，取而代之嘅係佢副手、勞福局副局長徐英偉（Caspar），對於連老人家都發火批評唔搞全民退保，Caspar就只可以硬食代做箭靶喇。