政情：黃雅芝回流生B仔 想攞香港身份證
香港鐘表業總會永遠名譽會董黃雅芝（Angie）去年結咗婚，隨夫婿到美國西雅圖定居，早前見佢挺住個大肚出現喺一個活動，原來佢特登返嚟香港待產。Angie笑笑口話BB係個仔，預產期係下個月上旬，返港待產目的一方面係想個仔攞香港身份證、回鄉證同埋特區護照，另一方面係媽媽可以就近喺佢坐月期間照顧兩母子，一舉兩得。
點解諗住個仔要攞香港身份證？Angie解釋，自己同老公都有美國護照，BB無論喺邊度出世都會有美國護照，所以就唔使執着喺美國生。佢話未來都係睇中國市場，所以BB有港人身份方便啲。
已經請咗專業陪月
Angie爸爸黃錦成見到個女返嚟梗係開心晒，黃太就話原本準備飛過去陪月，依家唔使佢舟車勞頓梗係好喇！佢哋已請咗個專業陪月，屋企又有工人姐姐，加上佢本身係護士，咁就安心晒喇！