政情：黃之鋒慷政府之慨$4000捐畀抗爭者
政府提出財政預算案「補鑊」計劃，向合資格嘅市民每人派錢四千元，但就惹嚟各界批評，香港眾志秘書長黃之鋒亦都鬧爆政府呢個補鑊派錢方案。不過鬧還鬧，黃之鋒作為理應符合資格攞呢四千元嘅人士，佢就話可能會將呢筆錢捐畀幫助在囚人士嘅基金。黃之鋒唔少盟友都因為示威抗爭而入獄，佢咁做即係慷政府之慨，去幫呢班被判坐監嘅抗爭者。咁政府呢次派錢，算唔算係捉蟲呢？
黃之鋒尋日出席民主派一個活動時，被問到點睇政府派錢。佢就質疑，政府只向合資格人士派錢，行政費用分分鐘仲多過市民收到嘅錢，如果係咁，就真係倒行逆施喇。佢又批評政府派錢冇時間表，又話政府冇透露派錢細節、點樣操作、同埋幾時先派到錢畀市民，尋日政府仲話市民可能最快都要等到二○一九年先至有得攞錢，對於等錢解燃眉之急嘅基層人士嚟講，真係好大鑊。
而黃之鋒所屬嘅香港眾志就認為，喺政府本來嘅財政預算案中，高薪人士或商家可以享有最高三萬元嘅退稅額，持有物業人士更可以享有每個單位一萬元嘅差餉津貼，仲要單位數目不限，但一般市民只可以每人獲派四千元，待遇簡直差天共地。香港眾志就建議，政府應向十八歲以上嘅香港居民每人派發一萬元先啱！
周庭羅冠聰料有份 加埋好和味
雖然政府派四千元，離香港眾志建議嘅一萬元仲有一段落差，不過黃之鋒都話點都係「有好過冇」。佢又話，自己仲係大學生，幾時攞呢四千元都冇乜所謂。至於拎咗呢筆錢之後點用，佢就話有朋友建議可以用嚟買iPhone，不過佢就反指四千元係唔夠買iPhone嘅，再講有排都未拎到四千元，都唔知到時出到乜嘢型號同賣幾多錢喇。佢自己就冇打算拎呢四千元嚟買嘢或去旅行，但就可能捐畀在囚人士基金喎。唔通佢想捐番畀佢嗰啲因為示威抗爭而被判刑嘅盟友？
話時話，香港眾志除咗黃之鋒外，仲係學生嘅香港眾志常委周庭，同埋已經被取消立法會議員資格的前議員羅冠聰都可能合資格拎到政府派發嘅四千元。佢哋咁多個加加埋埋，應該都幾和味喇。