中環出更：冇票投畀姚松炎 吳文遠認衰
立法會四個議席補選告一段落，代表民主派參選九龍西補選嘅前建築界立法會議員姚松炎以約二千票之差輸咗畀民建聯鄭泳舜，冇得重返議會，社民連主席吳文遠尋日公開認衰，承認都要負上責任。此話何解？吳文遠自爆本身係九龍西嘅選民，但因為唔記得更改地址資料，結果喪失選民資格，冇得投票支持姚松炎。
唔記得改地址 失選民資格
吳文遠尋日出席一個泛民呼籲市民登記做選民嘅活動時話，自己係九龍西選民，但之前搬咗屋，唔記得改地址，去年年中忽然醒起時，已經過咗選民更改資料時限，搞到喪失選民資格，冇得喺早前嘅補選中投票。佢又提及，為咗彌補自己大頭蝦過失，所以落力為姚松炎企街站拉票，仲曬到額頭甩皮添。
同場嘅立法會議員陳志全就話，自己之前都搬咗屋，第一時間就係更改選民登記住址資料。佢仲話，自己周不時都會上網檢查自己仲係唔係選民，因為擔心畀建制派對手偷偷幫佢改地址，令佢喪失選民同參選資格喎。
卓妮