中環出更：李柏成投資巴布亞新畿內亞 笑當地金槍魚有隊形
講起大洋洲國家巴布亞新畿內亞，唔少人就會諗起半世紀前，當地有疑似獵頭族出沒，不過依家當地慢慢開放，乜都唔同晒。早前卓妮喺博愛醫院嘅慶功宴上見到副主席李柏成（Jim），佢話最近忙到氹氹轉，事關佢同生意拍檔正在落實喺巴布亞新畿內亞嘅投資項目，打算同當地政府合作開發一個小島，由發展旅遊、起碼頭到成立漁船隊等，聽落真係好大投資。
香港人一向鍾意旅行，仲愈玩愈刁鑽。Jim話，現時香港已有直航班機去該國首都莫爾茲比港，上海即將開通到呢個小島嘅直航班機，到時就方便得多。佢笑笑口話當地盛產金槍魚，啲魚好得意，好似阿拉伯數字八字咁繞住個小島游，好有隊形喎。
簡陳擷霞放假同孫踩單車
同場仲有主席彭少衍、副主席吳錦青及簡陳擷霞等人。博愛啱啱舉行完重點籌款項目單車百萬行，吳錦青都有參加，仲係董事局之中最快到達終點嘅人。簡陳擷霞笑言多年前參加過一次，但係因為太耐冇踩，結果跌低好多次，所以怕咗，依家只係趁假期同孫仔去吐露港踩吓單車就算喇。
另一方面，屯門區議會主席梁健文、葵青區議會主席羅競成亦有現身撐場，佢哋不約而同提起區內有唔少新公屋即將落成，但係交通運輸就明顯不足，其中梁健文好肉緊話，嚟緊屯門區至少有二萬個單位落成，但係政府淨係識起屋，絕口不提交通運輸嘅配套措施，佢哋有同政府反映，但係冇乜反應，擔心區內人口再增加十萬、八萬，到時交通運輸負荷唔到，分分鐘好事變壞事。
卓妮