政情：大女有小學收 張國鈞安樂晒
做人父母甚艱難，尤其係搵學校真係有排頭痛呀！身兼行政會議成員嘅立法會議員張國鈞（Horace）話，大女終於有小學收啦，仲要係一條龍添，真係放下心頭大石呀，佢笑指以後十幾年可以安心做議員啦！
話口未完，又未安心得晒喎。Horace話細女明年都要搵小學，雖然大女有學校收，細女再考同一間學校都有少少着數，但細女嘅成績就冇咁好，都有少少擔心。講咗咁耐，到底佢嘅大女兒係邊間學校收咗呢，佢就唔透露嘞，因為擔心有政見唔同嘅人，會因為佢而影響到囡囡。
王政芝二女快出世
同場仲有新民黨青委會主席王政芝（Gigi），佢嘅第二個女就快出世啦，預產期係五月初。佢笑指依家得番三分一個老公，因要同兩個女分喎，所以想追番個仔，依家興大家庭，覺得生夠四個都冇問題！