政情：離開熱廚房 張炳良狂去旅行
正所謂「無官一身輕」，睇吓運輸及房屋局前局長張炳良就知喇！佢離開政府呢個「熱廚房」之後返去教書、做吓研究，仲去咗好多次旅行添！真係優哉游哉o架！
張炳良依家係香港教育大學研究講座教授同香港科技大學客席教授，佢話教書嘅時間比較鬆動，好多工作都係自己安排，可以按自己嘅節奏做嘢，相比之下做政府時，每日行程都密密麻麻，而且幾乎係廿四小時on call（候命），最後連自己啲假都放唔晒！
做教授冇咁多突發事件
原來佢習慣每年最少放一次長假，大概係兩個星期左右，會同太太去旅行放鬆吓，但做官嘅時候就取消過兩次，一次係因為鉛水事件，另一次就係高鐵事件，仲話遇着呢啲突發情況都冇辦法，但做教授就唔同喇，冇咁多突發事情，去旅行都容易得多，所以離開政府之後都去咗好多次旅行，實行補番數咁話！