政情：劉業強劉國勳 工作報告鬧雙胞
唔少立法會議員會出版年度工作報告，向選民交代議會業績，有政圈人士發現，身兼新界鄉議局主席嘅劉業強同民建聯（民記）劉國勳嘅議員工作報告，不論封面嘅用色同排版等都好相似，唔通佢哋心有靈犀？
封面用色排版相似「屬巧合」
劉業強同劉國勳嘅報告，封面同樣選擇喺立法會大樓五樓室外平台，幾乎同一位置；而兩人同樣穿上藍色西裝褸；標題亦係藍底白字；副題「工作報告」等字眼完全一樣，甚至連立法會同所屬組織嘅擺放位置都喺右上方，但報告內容同排版都不盡相同，唔似封面「撞得咁應」。
由於劉業強嘅報告先出版，據悉有人不滿劉國勳涉嫌連工作報告都抄。劉國勳回覆我哋查詢時否認抄襲，又話封面拍攝位置一向係熱門影相位，標題顏色就係向設計公司要求民記黨徽嘅藍，故以全身藍色示人，強調「真係咁啱得咁橋」。
劉業強睇完都覺得兩份報告好相似，但唔認為係劉國勳抄佢，反而笑笑口咁話可能係因為佢份報告做得好，所以深深咁入咗劉國勳嘅腦海入面。佢覺得成件事都幾搞笑，事後亦都有同劉國勳溝通過，睇嚟都係一場巧合，絕對唔會影響到佢哋嘅關係咁話。