政情：財會撥款大塞車政府跪低調議程

約80項審批 僅餘60多小時

財委會主席陳健波講過，今個立法年度、即至今年七月財委會只有六十多個小時會議時間，但政府仲有約八十項撥款打算提交至財委會審批。不過，當中只有約四十項係已經可以提交至財委會，其餘大部分仲喺財委會轄下嘅工務小組委員會等待審議。而喺政府提交嘅撥款申請中，仲有唔少具爭議嘅項目，包括沙中線超支、落馬洲河套地區發展等工程撥款。而根據尋日立法會文件，政府已要求工務小組喺四至七月加會廿二小時。

面對議程「大塞車」，政府亦無意撤回部分議程，咁點搞呢？睇嚟政務司司長張建宗同財經及庫務局局長劉怡翔都（手窊）爆頭，唯一做法就係採取「先易後難」嘅方式處理。據了解，政府將於明日同陳健波及各黨派議員開會，商討調動議程。雖然早前建制派通過修改財委會、財委會轄下嘅人事編制小組委員會及工務小組嘅會議程序，民主派拉布力量大減。

但據統計，八成喺工務小組通過咗嘅項目提交至財委會時都要再次討論，人事編制小組通過嘅項目更係幾乎百分百要喺財委會再傾過，所以政府都咪話唔擔心。

倘泛民玩嘢 或修改會議程序

有建制派就覺得好多議程明明已分別經工務及人事編制兩個小組審批，但民主派仲要喺財委會就相關議程再拉布爭拗，真係費時失事。有建制派就透露，如果民主派今次再唔合作同拖延審議，分分鐘會有修改會議程序第二波，令喺財委會轄下兩個小組委員會通過嘅項目，唔能夠再喺財委會討論。如果係咁，財委會就變成橡皮圖章，相信將必引起新一輪爭拗戰喇！