中環出更：公然捐三萬元予民主黨 林鄭捱轟
特首林鄭月娥公然與民主黨有錢銀轇轕捱轟！林鄭尋晚出席民主黨二十三周年黨慶籌款晚宴，逗留約一小時後離開，當民主黨前立法會議員李華明正在台上獻唱《笑看風雲》時，林鄭突然舉手要求捐錢，即席寫下點唱紙願意捐款三萬元，印象中呢個係現任特首出席政黨籌款晚宴，首次公開捐款予個別政黨，有建制派中人事後炮轟林鄭捐錢、民主黨收錢嘅做法離譜，直斥政治倫理淪亡，有網民更話林鄭呢個做法，係咪預示以後出席唔同政黨籌款，都會一視同仁捐錢？
鄭若驊陳方安生亦有出席晚宴
林鄭尋日率領大批政府高官出席民主黨籌款晚宴，包括受僭建醜聞纏身嘅律政司司長鄭若驊，而林鄭身處嘅主家席，兩邊係民主黨主席胡志偉及海洋公園前主席盛智文，同坐主家席還有「民主阿婆」前政務司司長陳方安生，民主黨前主席劉慧卿等，其中林鄭更一度同民主阿婆握手。林鄭事後更於Instagram發貼，上載出席民主黨籌款晚宴嘅相片，其中一個hashtag為「大和解」。
「與個別政黨喺陽光下眉來眼去」
林鄭捐三萬元予民主黨嘅消息曝光，建制派大為詫異，有建制派中人話，林鄭號稱嘅管治新風格，莫非係公開捐款予個別政黨，與個別政黨喺陽光下眉來眼去？
有地區人士則揶揄林鄭，佢哋多次要求港府就財政預算案補鑊，向全民派錢數千元，但都不得要領，言猶在耳，林鄭尋日二話不說就自掏腰包捐錢予民主黨，該名地區人士憤憤不平話，又唔見林鄭喺庫房盈餘爆燈下，對於普羅市民訴求慷慨啲。
卓妮