中環出更：沙士搞電腦節 商會話靠冒險同運氣
做生意除咗講眼光，運氣同膽識都好重要。香港電腦商會日前廿周年會慶，創會會長張耀成話商會多年來所舉辦嘅電腦節雖然係城中消費盛事，但亦曾經因沙士疫情而險告取消，然而商會方面敢於冒險再加上唔錯嘅運氣，當年嘅電腦節先至順利舉行。
張耀成話喺○二年搞電腦節，外間反應唔錯，政府建議商會翌年再辦，點知當商會籌備第二屆電腦節就遇上沙士疫情肆虐，政府見勢色唔對打算叫停，但商會方面見「洗濕個頭」不宜中途放棄，堅持舉辦並承諾倘有經濟損失概由商會嘅一眾會董承擔。結果喺電腦節舉行前兩星期，世衞撤除咗香港嘅疫埠警告，沙士病患個案一路遞減，「閉關」好耐嘅市民紛紛出街消費，電腦節大收旺場。
陳家豪曾焊接土炮電腦賺錢
電競產業係年輕一代嘅新出路，香港電競總會主席周啟康（Ryan）就係張耀成眼中大有前途嘅電競業領航員，Ryan話電競產業喺港人眼中仲係新鮮事，但喺西方世界電競嘅地位早已同體育賽事看齊，佢又話電競除咗參賽選手，仲有教練、賽評人、分析師同轉播等唔同位置角色，形式上同傳統嘅球賽競技類似，因此亦可衍生相關專業，畀年輕人發揮所長。
智慧城市聯盟金融科技委員會主席陳家豪（Emil）話八十年代初期，外國入口嘅個人電腦售價動輒過萬，一般受薪階層難以負擔，於是佢就走去深水埗搜羅集成電路元件，然後再用焊接方法砌出土炮電腦來售賣。由於價格廉宜，土炮電腦銷路唔錯，佢亦藉此賺番些少外快。
卓妮