喺立法會宣誓「玩嘢」而被法院取消議員資格（DQ）嘅社民連梁國雄（長毛），已申請司法覆核，諗住勝訴就攞番新界東嘅議席，敗訴亦可再戰新東。由於宣揚港獨嘅青年新政游蕙禎同自決派嘅香港眾志執委周庭以後都冇得參選，但勢估唔到長毛既唔係自決派，又唔撐港獨，就因為佢曾任支聯會常委，而「結束一黨專政」係支聯會嘅綱領之一，兼且佢喺過往好多示威同集會中嗌過呢個口號，亦可能被DQ參選資格，入唔到閘。
