政情：出現喺立會文件 劉小麗「復活」？

話說立法會最新一份有關檢討勞工法例嘅文件中，竟然再次見到「劉小麗議員」幾個字，兼且其修正案仍然長存。不過就見到秘書處寫明備註話劉小麗已被DQ，無權再以立法會議員身份行事。換言之，劉小麗嘅修正案只係有得睇，唔使理，永遠埋葬喺文件之中。

勞工界議員何啟明喺舊年七月作出一項動議，為「全面檢討勞工法例，改善勞工權益」嘅議員議案，可惜緊接其後有DQ風波、修改《議事規則》同立法會補選等，所以有一大堆議員議案積存未能處理。立法會最新一份文件顯示，呢項議案終於可以重見天日，暫列於嚟緊周三嘅大會議程中。

所提修正案隨議員被DQ

議案文件內，仲可以見到「劉小麗議員」嘅修正案，包括要求提高法定最低工資水平及實施「一年一檢」、訂定標準工時以取代上屆政府建議嘅「合約工時」等。姑勿論呢啲要求係唔係打工仔嘅想法，亦只會隨同「劉小麗議員」一同被DQ。