政情：蔣麗芸噏得就噏亂射羅智光

立法會公務員及資助機構員工事務委員會尋日召開會議，阿Ann不停就中醫津貼方面向政府提供意見，仲即場糾正羅智光有關中醫服務嘅情況，搞到羅智光尷尷尬尬咁回應話「蔣議員你嘅資訊比我更貼地」。

指架構臃腫 倡合併或取消

跟住阿Ann仲中醫師上身咁為政府架構把脈，話依家政府成日去信要求加開職位，擔心有部分政府部門喪失功能同埋「臃腫」，佢舉例指家計會喺成立初期，係希望香港人節育，「唔好生咁多，正所謂一個嬌，兩個妙，三個呱呱叫，四個斷擔挑」，但現時政府卻鼓勵市民生育，質疑家計會嘅功能係咪要改變。

佢又反問現時寮仔部係咪仍然存在，但佢喺發言期間亦澄清，唔係對寮仔部同家計會有特別意見，只係希望政府「唔好咁臃腫」，擔心會出現有部門工作量不足，要求政府作出檢討，合併或取消某啲部門。

將家計會誤當作政府部門

羅智光回應時強調每個部門會「簡政放權」，避免出現公務員體系有「臃腫」情況出現。佢又話寮仔部係處理建築物僭建問題，而家計會因唔屬於政府部門，所以唔係由公務員事務局管轄。聽到佢咁講，可能都意會到阿Ann係射錯咗，但阿Ann隨即反駁，指家計會雖然唔係政府部門，但係屬政府資助機構，所以都要檢討。

此外，政府計劃建議設立公務員學院，阿Ann亦建議政府唔應該喺中環、油尖旺同深水埗等地覓地設立，更建議短期課程可以喺政府嘅大型會議室進行，亦可考慮喺離島搞兩日一夜嘅學習營，因離島有大量地方，而且環境清靜又不受爭議，屆時政府亦可收起公務員嘅手機！佢仲話，「咁你（羅智光）喺嗰度咪得囉。」睇嚟羅智光真係要去一去學習營，首先同公務員交流吓點樣同議員溝通嘞！