中環出更：想黐自己友 鄭泳舜謝偉銓叫秘書處讓房
立法會四名新丁議員聽日宣誓就職，之前佢哋已選定立法會內嘅座位，喺辦公室方面，民主派區諾軒同范國威早已決定接收原來羅冠聰同姚松炎喺九樓嘅辦公室。據悉，建制派鄭泳舜同謝偉銓就因為想同「自己友」埋堆，要求立法會秘書處交出分別喺六樓同八樓嘅儲物房用作辦公室。
現用作儲物室
因為取消議員資格（DQ）而令立法會有六席出缺，主要吉出嚟嘅辦公室分別喺九樓同十樓，而九樓正係民主派陣地，有民主黨、專業議政等，故此兩名建制派絕不考慮深入敵陣，特別係「真新丁」鄭泳舜。民建聯嘅重地就喺六樓，目前有兩間吉房，但據知已被秘書處用作儲物同辦公室用途，鄭泳舜為咗盡快適應議會工作，要求入主六一九室。至於謝偉銓嘅舊辦公室位於八樓，但已被工業界吳永嘉取用，據知謝亦要求秘書處讓出八一九室。
據了解，秘書處正在執拾社民連梁國雄同自決派劉小麗原來位於十樓嘅辦公室用嚟儲物。即係下一輪補選進身議會嘅兩名新丁，將只可選用青年新政游蕙禎同梁頌恆原來喺十樓嘅相連辦公室，或位於民建聯重地嘅六一八室。
卓妮