中環出更：中成藥揚威西方業界籲藉機推廣
一款家喻戶曉嘅老牌枇杷膏早前喺美國突然爆紅，因為當地人視之為「止咳神藥」，價格仲搶高近十倍。香港中成藥商會創會主席丁志輝覺得好開心，形容今次中成藥喺西方揚威，證明中醫藥係老祖宗流傳落嚟嘅寶庫，業界應乘機大力推廣，令中醫藥喺世界佔一席之地。
丁志輝話西方國家過往唔信中藥，認為唔夠科學，但係好多中藥古方歷經幾千年都仲存在，部分中成藥仲愈嚟愈多外國遊客嚟到香港都會買。今次枇杷膏喺美國咁受歡迎，造成轟動效應，政府及業界應趁機推廣，特別係藉着一帶一路政策令中藥走出去。佢又話最新施政報告宣布撥五億元支持中醫藥，係有史以來首次以財政支持中醫藥，對業界係一個大喜訊。
中藥集團第三代傳人、中華總商會副會長李應生都話，應該乘勝追擊推廣中醫藥，唔單止着眼本地市場，仲要利用多種文字向海外華僑同外國人推廣。佢認為今時今日中成藥已經好科學，因為要有齊晒報告先可以註冊，唔係亂噏o架！
包裝爛咗 黃楚基自己食番
家族做中成藥代理生意嘅百仁基金副主席黃楚基都係中醫藥擁躉，笑稱經常食清熱解毒嘅中成藥，尤其係燒嘢食之後，但佢食嗰啲都係包裝爛咗嘅，事關啲中成藥喺運送過程中難免會有損壞，佢哋就會留番自己食。
卓妮