政情：研快餐店規管 黃國健撈過界 張宇人有排煩

立法會秘書處喺一六年十月開始邀請議員申請研究工作名額，每個月按議員建議進行一項專題研究或者一項資料搜研工作，所以研究工作名額實屬僧多粥少，唔少議員經多次抽籤都未獲抽中。今個月就有十二項申請，因上次抽籤中未獲編配名額而納入今次抽籤中，再加上四項新申請，結果就抽中議員莫乃光嘅申請，而有關研究當然就係佢向來積極推動嘅《檔案法》喇！

其他抽唔中申請就等下一輪抽籤再處理，當中包括麥美娟研究放債人同財務中介公司監管問題，朱凱廸亦透過申請研究工作，跟進回收業營運狀況問題，至於代表鄉議局嘅議員劉業強亦都申請研究偏遠鄉村發展民宿文化旅遊；醫學界議員陳沛然則申請研究醫療服務，呢幾位議員提出嘅項目都係佢哋本身一直關注嘅問題，但係KK就離奇地申請研究快餐店食物。按道理，佢應該係研究勞工權益嘅問題，快餐店食物安全又關佢事？

打工仔常食快餐 與勞工有關

KK接受查詢時話連鎖快餐店食物關係食物安全問題，加上唔少打工仔一日兩餐都喺快餐店內解決，直言呢個研究主題同勞工有關，而佢亦經常喺議會工作，都係立法會大樓對面一連鎖快餐店嘅熟客添！佢更講到連鎖快餐店已成為香港飲食業嘅主流，其環境衞生、營養價值同港人生活息息相關，所以絕對需要政府關注，而透過研究去建立標準更加係一件好事。

考慮提質詢及議案 開始跟進

講得好似幾有道理，但似乎撈過界喎。佢亦承認呢個議題非其所屬嘅工聯會主要跟進問題，但隨住社會變化，就認為需要大家多加關注咁話，再加上議題又與打工仔健康有關，佢講明除咗申請研究，提出質詢、議案等渠道都會考慮去做，仲話要開始去跟進呢個議題添！咁睇嚟，張宇人就有排煩嘞！