中環出更：名人舊照 估你唔到
西貢區議員方國珊嘅舊相，清純樣引起網上一陣熱潮，外界見到嘅時候，第一時間都未必諗到係佢本人，令到唔少網民都覺得好訝異。其實唔少名人舊嘅樣，大家都未必認得出，卓妮喺馬場就問多位名人攞咗幾張舊相，考吓各位讀者眼力，睇吓大家認得幾多個？
呢兩張黑白相一睇就知道有啲歷史，相中呢位身形較瘦嘅男子戴住草帽，着住一件短袖橫間衫，手中攞住支膠槍。至於另一張相就有一位女子，喺相似嘅背景戴住一條頸巾，大家估唔估到係邊個呢？原來該名男子係馬會大董葉澍堃，依家明顯較當年肥咗，佢話當時攞住支膠槍扮司馬華龍，而另一張相嘅女子就係佢嘅太太。佢話呢兩張相係一九七一年影嘅，當年唔流行自拍，所以夫婦冇合照，只有互相幫對方影相。
劉燊濤同太太「一相定情」
呢位坐喺地下嘅籃球健將，黑黑實實咁，到底係長頭髮定係戴住頭巾，就好難睇得清楚嘞。原來呢位係香港工業總會青年委員會名譽會長劉燊濤（Gary），佢話呢張相係佢同太太定情嘅相，當時係二○○二年，佢同太太係大學同學，Gary就參加一個籃球比賽，太太當年影咗相，喺一個聚會上問佢有冇興趣攞番，Gary話攞番後，二人就愈來愈熟落，後來仲結埋婚添，所以呢張相，佢一直都隨身帶住。
至於呢張九十年代初嘅舊相，相中人相信大家都會覺得非常容易認出，就係香港北京交流協進會會長施榮懷及其太太，二人真係冇乜點變，保養得幾好。施榮懷話以前冇數碼相，只有硬照，太太就負責保存相片，記錄一家人嘅成長過程。太太真係身負重任呀！
卓妮