南韓模特兒迷人嘅特質，樣靚固然係其中一個重要元素，身材同樣相當誘人，前凸後趷嘅玲瓏曲線，本嚟已經夠晒養眼，配上一對修長美腿嘅話，對視覺更具殺傷力，好似文架景正係憑住以上優點集於一身，而成功喺模特兒界備受注目。
乜嘢叫做火辣身材？前凸後趷絕對係基本條件，加埋一對修長美腿，呢種身材先至真正稱得上火辣。不過，擁有火辣身材卻衣着密實嘅話，實在係浪費天賦本錢。喺南韓京畿道富川市出生嘅文架景，少女時期已經擁有一副迷人身材，不過當時佢唔覺得自己係當模特兒嘅材料，亦未諗過未來會朝模特兒界發展，反而希望從事同影視製作有關嘅工作，因此高中畢業後，便報考水原大學戲劇與電影學士學位，希望喺影視界發展。
正當佢埋首苦讀之際，一次功課需要，佢要扮演一位模特兒，為咗演繹出箇中神髓，佢便請教一位兼職模特兒嘅朋友，喺對方嘅介紹下，開始兼職攝影模特兒嘅工作。本嚟以為可以透過呢次機會進行資料搜集，卻估唔到因此而對模特兒工作產生興趣，同時憑住出眾外形獲得唔少人氣。雖然佢對模特兒工作感到興趣，但係面對自己嘅夢想，令佢唔知點樣選擇好。呢個時候模特兒事務所見佢嘅工作表現出色，便游說佢全力投身模特兒事業，結果大學畢業後，佢就以職業模特兒身份出道。經過短暫嘅攝影模特兒工作作為熱身後，2012年佢以車模身份喺釜山國際汽車展上處女登場，表現大獲好評，為佢打下一支強心針。
初次演出成功，不但令佢自信心大增，同時為佢帶嚟更多演出嘅機會，頻頻喺大型車展上亮相。2014年佢踩入賽車女郎界，化身成性感賽車女郎，喺賽場上同大家見面。修長美腿加上低胸嘅賽車女郎制服，令佢成為賽場上嘅焦點，人氣大幅提升。不過講到人氣爆發，就係佢參加超級賽車模特兒大賽，憑住喺賽車女郎界闖出嚟嘅聲勢，加上喺車模界活躍期間累積嘅經驗同人氣，結果獲得模特兒大獎，令人氣直線飆升。
佢表示呢次比賽最大嘅得着，係令佢性格改變。原來喺佢啱啱出道嘅時候，經常畀人話佢對人嘅態度冷冰冰，有種生人勿近嘅感覺，而佢解釋係因為自己性格相當怕醜，唔識得點樣同陌生人打開話題，佢笑稱：「一直諗住做影視幕後嘅工作，點估到自己有朝一日會走到幕前？」比賽之後，佢學識點樣同人溝通，更學懂唔少做人處事嘅技巧。而近年佢積極朝住演藝界發展，相信未來總有一日可以完成佢嘅夢想。
簡介：文架景最迷人嘅焦點，相信非一對修長美腿莫屬，但其實佢亦屬於心口有料之人，由於佢平時無刻意露出事業線，故此鮮有讓人欣賞到佢巨乳魔力嘅機會，睇怕要等佢成為內衣模特兒至得啦！如果大家想了解佢多啲，就要Click入呢個網站喇！
網址：http://cafe.daum.net/lovely-kyung
出生地：京畿道富川市
身 高：172cm
三 圍：35-25-36
撰文：魂