政情：九西次輪補選泛民難搵人選

民主派原本派出兩名DQ議員劉小麗同社民連「長毛」梁國雄，分別出戰九西及新界次輪補選。其中長毛雖然係一位激進「大中華膠」，但佢喺民主派同社運圈子一向人緣不俗，同溫和泛民以至本土自決派都有偈傾，應該唔會好似新同盟范國威咁，同時畀兩派嘅部分支持者杯葛。

劉小麗或DQ 又恐「屈基」重演

劉小麗嘅狀況則完全唔同，佢以往靠批評民主黨同民協等溫和泛民起家，但又不獲青年新政同本土民主前線等激進本土派視為自己友，難以盡吸兩邊票源。

最重要嘅係，選舉主任喺首輪補選收緊咗DQ參選人嘅準則，除咗支持港獨，主張「民主自決」都過唔到關，各界都估計屬於自決派嘅劉小麗，即使參選亦極可能被DQ，民主派有必要諗定「Plan B（後備人選）」。

講到Plan B，九西地膽民協馮檢基同民主黨袁海文都係合理人選，但係本土自決派肯定唔會力撐，甚或會重演「屈基事件」。

怕梁家傑李卓人易請難送

喺首輪補選中，自決派提議過由兩名立法會前議員，即公民黨梁家傑或工黨李卓人空降落九西做「Plan D」，但民協同民主黨可能又會擔心兩人「易請難送」，影響自己喺二○二○年立法會換屆選舉嘅利益，隨時好似今次姚松炎空降九西咁，因民協同民主黨樁腳「hea撐」而落選。

若果民主派最後搵唔到一位有實力兼獲各方支持嘅人選出戰九西，建制派隨時可以喺該區連贏兩仗，繼續保住立法會分組點票話事權。