中環出更：財案無助基層 波叔畀學生追債
財政司司長陳茂波（波叔）上月底發表咗新一份財政預算案，唔少政黨都炮轟照顧唔到基層需要。陳茂波尋日出席香港青年協會嘅活動，同十七間中學、約二百五十名學生對談，畀啲學生就財政預算案提問，殊不知唔少學生都覺得預算案幫唔到基層。
話資助上樓令青年「更加傷」
喺活動上，劈頭就有學生質疑點解要撥款畀海洋公園，話海洋公園喺動物保育方面違反世界趨勢，而且一萬張門票只可以滿足極少數嘅中小學生咁話。波叔解釋海洋公園係唔少一家大細鍾意去嘅消閒娛樂地點，撥款係想佢擴建，增加吸引力，等佢可以繼續營運，至於門票就係海洋公園自願提供，同三億元冇關嘅！
住屋問題都係青年人擔心嘅問題，問到點解唔資助基層上樓？波叔就話未來房屋供應充足，樓市日後仲會有調整，但隨美國加息可能仲會有波動，所以如果資助青年上樓，恐怕會令佢哋「更加傷」！
唔少學生都問到運動、電競相關嘅問題，話政府提供資源不足，就好似精英運動表面上就有好多支援，但實際上被納入精英運動嘅項目就少，根本幫唔到運動員，而波叔只係話加咗錢畀運動員基金，都唔知可以幫到幾多項目、幾多運動員維持生計。
卓妮