中環出更：旅行上唔切車孫大豪險唔見咗老婆
最近歐美不時出現大風雪嘅極端天氣，唔好彩遇上就好狼狽。香港鐘表業總會（總會）早前舉行新一屆董事會就職典禮，原主席孫大豪同三位副主席冧莊做多一屆，但現場一直唔見副主席李永安嘅身影，原來佢喺美國遇上大風雪，趕唔切返嚟參加就職典禮，真係失晒預算喇！
講起出外旅行嘅甩轆事件，孫大豪最難忘有次同太太去歐洲滑完雪，打算轉火車去參加瑞士鐘錶展，當佢哋落車換另一列車時拎漏咗一個隨身手袋，於是急急腳返轉頭去攞，點知拎番手袋未趕得切上車，火車就開走咗，眼白白睇住太太同五件行李一齊隨車揚長而去。當時佢手機又冇電，搞完一輪先至聯絡到太太喺下一個車站等佢。佢諗起都覺得驚險，笑稱爭啲唔見咗太太添！
蔡宗富太好瞓 煞停當降落
副主席蔡宗富都有一次搞笑經歷。佢曾經喺香港搭凌晨一點幾飛機去杜拜，上機冇耐就瞓着咗，後來被飛機急停弄醒。佢望出窗外見飛機正滑行返客運大樓，仲以為已到杜拜，其實仲喺香港機場。原來當飛機加速準備起飛一刻，發現零件故障而突然煞停，結果要等到朝早九點幾先至再起飛。
出席晚宴嘅賓客仲有太子珠寶鐘錶主席鄧鉅明、新加坡鐘錶業公會副會長梁兆權同新青會副會長吳聖傑夫婦等，孫大豪嘅爸爸孫秉樞同姪仔孫智威都喺度。鄧鉅明話同太太啱啱去完台灣出席旗下金飾店員工春茗，個個都話台灣經濟唔好，但係佢哋台灣分店去年生意唔錯，員工咁拚搏，老闆梗要親自去打氣喇！
卓妮