政情：選區研增新界北 建制泛民爭崩頭

現時立法會地區直選分成五大選區，當中嘅新界東同新界西就各有九個議席，而隨住香港人口北移，新界人口近年都持續上升，相反香港島人口就下跌，所以按照人口比例，的確有需要作出調整，而今屆立法會就已經將議席微調，港島區由七席減至六席，多出的一席則撥落九龍西。不過，受到《立法會條例》所限，每個地方選區法定議席上限為九席，即使目前人口比例與議席數目不符，都無辦法再調整各區議席去增加新界東同新界西嘅議席數目，所以就引伸出重新劃區嘅考慮。

建制冀2024年始實行

據了解，政府已陸續向唔同政黨了解對劃區嘅睇法，初步建制派都認同劃區嘅需要，願意同政府坐低傾，但佢哋就對幾時實行劃區有較大嘅意見，普遍認為唔可以趕於二○二○年換屆選舉實行，因為時間緊迫，未能夠為選舉工程做足準備工夫囉！

立法會雖已經修改《議事規則》，理論上議事效率有所提高，但現時已經係一八年，立法會又要處理廣深港高速鐵路一地兩檢方案同《國歌法》本地立法工作，相信選區劃界一事，最快都要今屆任期尾先能夠獲得通過，如果通過就立即實施，建制派即使現時開始部署劃區後嘅選舉工程，兩年時間仍然不足，因為需要研究派人、拉票等，又要選民適應，所以建制派共識就係，劃區可以先喺今屆立法會通過，但實施就應該留待再下一屆嘅選舉，即二○二四年先推行，令所有候選人都清楚參選下屆後就要於四年後再執位。

劉國勳林卓廷勢轉區

話時話，民建聯嘅劉國勳係立法會區議會（第一）功能界別嘅議員，以及民主黨新界東議員林卓廷都係北區區議員，若果劃新界北區嘅話，佢哋都有可能會轉區出選，大家不妨放長雙眼睇吓。

其實以往亦傳出多個劃區方案，始終議席分布牽涉利益問題，各個政黨必定由自身利益去提出建議，所以目前就實施時間就算有共識，最終成唔成功推動劃區都係未知之數。