中環出更：陳寧寧搶先接莊 城中青團首位女當家
匯集香港一班熱心公益年輕企業家嘅百仁基金早前舉行新一屆理事會就職典禮，做咗五年主席嘅李文俊交棒畀原副主席陳寧寧。陳寧寧係城中幾大青年組織之中嘅首位女當家，佢笑笑口話聽聞香港菁英會下一個接棒嘅係女士，所以佢搶先做咗先喎，真係識講笑。
陳寧寧來自北京，佢話女性喺香港發展嘅機會的確比較多，佢希望承擔更多社會責任，幫助擴闊年輕人嘅視野。由於佢鍾意運動同健身，所以都會做多啲呢方面嘅工作。講起做運動，佢日日快跑四十分鐘、做瑜伽，體重同高峰期比至少甩咗十幾磅，難怪望落清瘦好多。
李文俊卸任後一樣咁忙
李文俊卸下主席職務升呢做會長，照計終於得閒啲，但係佢太太就話老公一樣咁忙，經常見唔到佢，而且就算唔做公務都要搵食，事關佢哋間全球第二大嘅造紙廠係廿四小時運作，停唔到機。李文俊就話遲啲會以自己名義嘅基金，資助青年去一帶一路國家交流，佢特別安排睇樓團，喺香港樓價高企嘅情況下，可以激勵港青喺異鄉搵到奮鬥嘅動力。
同場仲有百仁基金創會會長李家傑、會長施榮忻、副會長林潞同副主席羅詠詩等人。身兼保良局副主席嘅林潞係福建社團聯會榮譽主席林樹哲個仔，佢一方面要睇住屋企地產同紡織生意，又要做慈善，忙到冇時停。不過同全年無休嘅李文俊相比，大約有兩星期新年假期，佢笑稱已經算唔錯喇！
卓妮