根據管理學著名嘅「梅菲定律」，凡係可以出錯嘅環節都會出錯，正如本港公立醫院事故鑊鑊新鮮鑊鑊甘，病人一隻腳踏入去，等於另一隻腳踏入閻王殿，威院醫生將食道球撐爆病人氣管，就係新鮮滾熱辣嘅例子。
話說有位六十多歲患肝硬化嘅病人，日前去威院照胃鏡，發現靜脈破裂大量出血，該院資深腸胃外科醫生為病人置入食道球緊急止血，點知竟然插錯入氣管並且充氣，直至個幾鐘後至由ICU醫生發現問題，進行緊急手術補鑊，以致病人肺部受感染，情況一度危殆，你話係咪靠害吖！
聽吓專家點講。病人由門牙到食道嘅位置，比門牙到氣管嘅位置長得多，醫生就算插錯位，半路中途都應該感受到阻力。照咁睇，如果醫生冇瞌眼瞓，呢啲咁低級嘅錯誤應該可以避免。
話時話，公院事故五花八門，無奇不有，點止撈亂氣管同食道咁簡單。左右不分之下開錯腦、膝頭哥開錯刀、激光射錯眼、調亂男女病人醫療數據……三日三夜都數唔完。須知醫生唔同其他職業，任何微小錯誤都足以影響病人性命，一次意外都嫌多。常言道，醫者父母心，如果主刀醫生真係當病人係屋企人，又點會咁粗心大意吖。
針對今次事故，威院例牌菜又係「高度關注」，成立委員會徹查。咪畀人睇死，到最後肯定又係大事化小，小事化了，你慌有人會被DQ咩？有辦你睇，早排瑪麗醫院外科名醫揼低已經開膛破腹、正等待接受移植手術嘅病人，自己走咗去接私人Job，全城鬧爆，結果除咗畀院方話兩句，乜事都冇。另外一位大國手甚至講到明，香港做肝臟移植嘅醫生人才難得，唔畀涉事醫生喺公院做手術，等於變相懲罰病人，咁即係點？即係病人焗住硬食囉！
大家睇到喇，醫療失誤「刑不上大夫」，除咗根深柢固嘅醫醫相衞文化，仲因為醫護人手長期不足，形成典型嘅「賣方市場」。即係咁，公院醫護七個蓋冚十個煲，的確係不爭嘅事實，淨係睇吓家陣冬季流感高峰期，一名護士要照顧十幾個病人，就知情況有幾嚴重。搞成今日咁，港府明知人口老化殺到埋身，卻冇未雨綢繆加強培訓，固然難辭其咎，醫護界自我保護心態亦係癥結所在，佢哋一方面猛呻做到有氣冇碇抖，另一方面抵死抗拒引入外援。目前香港醫生病人比例遠低於其他先進地區，但咁多年成功申請來港執業嘅醫生，十隻手指數得晒，咁搞法，唔出事至奇。
始終都係嗰句，有競爭先有進步，關起門做皇帝，只會為白色巨塔帶來腐敗，到頭來受害嘅始終都係廣大病人！