中環出更：議員失「禮」 馬逢國倡再教育
中國傳統文化博大精深，時至今日都備受推崇，而「禮」就係其中一個重要嘅元素。立法會體育、演藝、文化及出版界議員馬逢國尋日出席一個推廣「禮」嘅文化活動後就話，依家有唔少議員唔合禮，經常搗亂議會秩序，又唔識尊重人，直指佢哋需要再教育。
馬逢國話依個年代好多學生，甚至成年人都已經冇咗「禮」嘅觀念，就好似最近香港浸會大學佔領語文中心班學生咁，明顯就係唔識得乜嘢叫「禮」，所以學校應該加強番相關嘅教育先至得！
質詢時唔識尊重 衣着隨便
除咗浸大學生，佢仲話立法會入面都有唔少議員需要「再教育」，話佢哋成日搞亂立法會秩序，而就算佢哋肯按程序討論議案，都係惡形惡相，特別係質詢政府官員嘅時候猶為嚴重，完全唔識尊重其他人。佢又指有啲議員衣着太過隨便，認為都係唔合乎「禮」嘅表現，建議政府加強「禮」嘅宣傳，例如拍吓短片、公益廣告，等啲議員可以從頭學過乜嘢叫「禮」喎。
卓妮