中環出更：關公像豎立荔枝山莊 後人關新剛：都要有正氣
香港山西商會（商會）舊年六月喺遮打花園舉行「關公節」，豎立二十呎高嘅關公像，傳揚關公忠勇仁義精神，呢座關公像日前已移至元朗大棠荔枝山莊舉行豎立儀式，關公像將會永久擺放，供市民免費參觀。關公第六十八代後人關新剛話自己都要發放正氣。
關新剛話山西都有一個關公像，但就豎立喺山上，依家香港終於都有一個喇。佢又話，自己祖先係關公關雲長，所以覺得自己都要發放正氣，而關公講求忠義仁勇，佢就認為「義」係最重要，有「義」字，自然就會有「忠」、「仁」、「勇」。佢仲同大家講，做人要做好事，說好話，多學習喎。
喺山西運城以青銅鑄造、高二十呎、重八噸嘅關公像豎立喺荔枝山莊，該處設有關公文化園，畀市民了解關公生平事迹。儀式當日仲有舞龍同醒獅表演，其中龍就代表中國，三隻「獅」就代表三國時期嘅劉備、關雲長同張飛。
當日商會副會長蔡建祥、元朗十八鄉鄉事委員會主席梁福元都在場。梁福元話關公像可以喺荔枝山莊永久放置，佢都覺得好開心。雖然豎立儀式上有點香，但之後就唔會有喇，因為呢度並唔作供奉用，亦都怕煙火造成危險喎。佢又話，喺度豎立關公像並唔係要導人迷信，只係想透過關公忠勇仁義事迹，帶啲正能量畀香港人。
麥美娟自言「義」字當頭
見到立法會議員麥美娟（Alice）當日都有嚟。問起有冇拜關公？Alice就話自己冇宗教信仰，但自言額頭有個「義」字，覺得做人應該要講義氣，憑良心去做事，守望相助咁話，咁樣香港就和諧喇！
卓妮