政情：公民講場：校園爆粗風波發酵楊潤雄無得避

中大學生會前會長周竪峰喺中大民主牆前爆粗罵內地人士「支那」，勢估唔到事隔半年，因浸大校長錢大康日前勒令兩名佔領語文中心的學生停學後，港大、中大同城大嘅民主牆亦出現以粗口辱罵浸大校長錢大康嘅標語，以聲援被停學嘅學生。依家件事風風火火，相信教育局局長楊潤雄都好頭痕，事關佢絕對唔可以對呢啲校園佔領同爆粗問題坐視不理，要快啲諗辦法去撲火，否則校園爆粗風波愈演愈烈，佢必定會火燒身。