落實高鐵香港段西九龍站一地兩檢「三步走」程序，剩最後一步本地立法工作，政府昨宣布相關條例草案今日刊憲，鐵定今個月立法會最後一次大會，即下周三提交相關條例草案進行首讀同二讀。由於負責條例草案兼捲入寓所僭建風波嘅律政司司長鄭若驊，突然提早喺下周一出席司法及法律事務委員會特別會議，料屆時將就僭建一事解畫，政府此舉可謂係提早拆彈，令議會喺下周三重回正軌，專注討論一地兩檢。
政府早前曾指最快喺一月底向立法會提交草案，惟早前有建制派反映，內地省、市政協會議亦喺一月下旬召開，擔心部分身兼政協嘅議員需返內地開會，令草案首讀有機會因建制派唔夠人而「甩轆」，故促請政府喺二月初先提交草案。
內地日前已公布政協名單，只涉及數名議員，故政府將維持喺下周三就草案進行首讀，以爭取多啲時間審議。
另外，特首林鄭月娥答應每個月出席一次立法會答問大會，最快喺下周三，而鑑於下月二十八日政府發表財政預算案，故佢只能喺下月七日出席另一次答問大會，變相一連兩周要回應議員質詢。預料下周三答問大會，林鄭仍需就鄭若驊僭建一事被狙擊，而下月七日則主力回應議員有關一地兩檢嘅提問。