中環出更：李家駿擇幾個吉日 防攝太歲逼爆圓玄學院
農曆新年就到，又係市民擇好日攝太歲同祈福嘅時候。圓玄學院社會服務部早前舉行慈善晚會，記得上年大年初八圓玄學院出現數萬人湧入攝太歲嘅逼爆場面，令人震撼。唔知今年有冇部署預防措施？
圓玄學院副主席湯修齊話年初會出現逼爆場面嘅原因，係知名玄學家麥玲玲喺新春節目上話當日係攝太歲最好嘅日子，結果大批善信就喺同一日湧入。圓玄副總幹事李家駿就笑笑口話，早兩個星期已打電話畀麥玲玲，獲對方應承嚟緊過年會擇多幾個吉日，善信就唔使逼埋同一日上山拜神，咁就完美解決喇。咁又係，俗語話「解鈴還需繫鈴人」，睇嚟呢招應該奏效嘅。
同場仲有圓玄學院主席陳國超、副主席鄧錦雄同荃灣區議會主席鍾偉平等人，多個城中善團董事局成員都拉隊去支持。當晚籌款目的係支援認知障礙症患者同埋特殊學習障礙學童，陳國超話希望未來投放更多資源支援。
陳國超日行八千步護腦
講起護腦，唔知名人有乜嘢特別心得？陳國超笑笑口話要多運動，自己日行八千步，一星期大約行三、四日。至於食嘢就奉行簡單原則。即係少肉多菜？佢笑稱唔係，而係樣樣都食喎。
轉頭見到蓬瀛仙館永遠館長洪少陵、仁濟醫院前主席羅嘉穗同總理孫蔡吐媚，洪少陵笑稱預防認知障礙症最好嘅辦法就係退而不休，所以佢同一班道教老友經常搞另類活動，好似第二日佢就同三十幾人拉隊去歷史名城湖北赤壁，出席城隍廟開光典禮，仲話日日忙到停唔到，咁就夠晒醒腦喇！
卓妮