歌仔都有得唱︰「為了靚靚，節食減肥搏命。」唔怪得美容院喺香港開到成行成市，美容業已經成為利潤豐厚嘅大產業，可惜由於政府冇監冇管，放任自流，部分不良業界掛羊頭賣狗肉，撈埋醫生嗰份，結果搞到亂象多多，意外頻生，顧客名副其實搵命博，你話班官係咪靠害吖！
呢嗱，法庭啱啱審完DR醫學美容集團單畸士，雖然集團創辦人同實驗室助理被判重刑，但致死致殘嘅三名顧客以及佢哋家人嘅創傷，點補都補唔番。正如法官話齋，被告明知涉事療程用作醫治癌症，仍屬臨床試驗性質，但為咗趕喺某私家醫院之前搶飲市場頭啖湯，倉卒推出，係罔顧客人的性命及安全。而協助苦主嘅立法會議員就話，希望判決能夠成為一個警號，等業界醒覺，唔好再攞消費者嘅健康同性命較飛。
不過講就咁講啫，蝕本生意冇人做，殺頭生意有人做，無良商人見錢眼開，邊有道義可言？掛住「醫學」牌頭嘅美容療程近年大行其道，有美容院甚至夠膽死話透過所謂「活化大腦」及佩戴磁石可以包醫癌症，最少兩名市民光顧後不幸病逝。類似療程萬騙不離其宗，統統都係山草藥噏得就噏，有咁誇張吹到咁誇張，背後完全冇科學證據，消費者信佢一成，雙目失明。
數字最能說明問題。今年頭十一個月，消委會收到近二百宗涉及高能量光學及入侵性美容嘅投訴個案，銷售手法、質素以至服務懷疑唔安全等樣樣齊，可知情況有幾嚴重。
令人難以接受嘅係，面對一次又一次血的教訓，官老爺居然無動於衷，關人個關。對於公眾要求立法規管涉及美容嘅醫療儀器，當局拖拖拉拉，直至今年初至推出《醫療儀器條例》。歎慢板都算嘞，雷大雨小嗰度至離譜，社會呼聲最大嘅實驗注射療程規管，固然喺業界強烈反彈下縮沙，高風險儀器由醫生使用及監管，更加連影都冇，所謂規管到喉唔到肺，淪為無牙老虎，慘劇會唔會重演，真係冇人話得埋。
當然啦，醫學美容服務良莠不齊，泥沙俱下，安全問題只係冰山一角。美容院不良銷售手法備受詬病，趁女客人寬衣解帶逼買貴價服務有之，將顧客反鎖房間焗人碌卡過數有之，有啲甚至連精神病患者都唔放過，巧取豪奪，仲衰過去搶。話就話有《商品說明條例》，但甚少見當局拉人封舖，基本上同鼓勵違法冇乜分別。
始終都係嗰句，官僚靠得住，豬乸會上樹。市民旨意佢哋把關監管，倒不如自求多福，愛靚之餘更加要愛惜生命！