政情：有相為證：政務司長官邸翻新 周聯僑評價麻麻
政務司司長張建宗位於山頂白加道嘅官邸，因為日久失修有好多結構性問題，要等待重新修葺翻新，張建宗直至上月中才搬入官邸。適逢入伙滿月，張建宗尋日就招呼約廿三名「建造業關懷基金」嘅家屬到訪參觀，包括建造業總工會理事長兼工聯會副會長周聯僑都有出席，觀乎做開建築嘅周聯僑對於官邸翻新嘅評語，好似對此唔係好收貨。
建議可以髹吓油
周聯僑解釋，官邸本身係歷史建築，「始終都要招呼客人o架嘛」，點都要執吓先可以住人，而且要對建築物做好保護，佢話今次到訪官邸感覺冇其他豪宅咁豪華，而且「企理、乾淨、整齊」，如果要執就可以髹吓油。
此外，周聯僑於席間提及今年工業意外多，而張建宗都有聆聽佢哋嘅訴求，表明政府會繼續關注工業安全問題。