政情：人大選舉 泛民雙重標準DQ自己友
港區全國人大代表選舉今日投票，由四十九名候選人角逐三十六個議席，選舉採用全票制，即選民要喺選票上揀足三十六個名先有效，否則會被當作廢票。民主派日前開會定出三十六人推薦名單，希望運用手中嘅約二百張票，令部分被指最「乞人憎」嘅建制派候選人落選。
指對方曾反佔中 被轟荒謬
不過，十三位被民主派DQ（不獲推薦）嘅候選人當中，竟然包括屬「自己友」嘅民主派高教界選委王凱峰，理由係佢曾表明反對以佔中等違法手段爭取真普選。
王凱峰事後就炮轟民主派嘅決定荒謬，寧願推薦其他同樣反佔中嘅建制派都唔肯支持佢。佢更以早前嘅特首選舉做例子，指前財政司司長曾俊華都唔支持佔中，民主派卻選擇支持對方，明顯屬雙重標準。
有民主派中人指，佢哋表面上有約二百張票，但其實大部分人都對今次人大選舉缺乏興趣，估計最後只會有數十人去投票，難以左右大局，依家呢份推薦名單又引起爭議，根本係庸人自擾、自取其辱。