指對方曾反佔中 被轟荒謬
不過,十三位被民主派DQ(不獲推薦)嘅候選人當中,竟然包括屬「自己友」嘅民主派高教界選委王凱峰,理由係佢曾表明反對以佔中等違法手段爭取真普選。
王凱峰事後就炮轟民主派嘅決定荒謬,寧願推薦其他同樣反佔中嘅建制派都唔肯支持佢。佢更以早前嘅特首選舉做例子,指前財政司司長曾俊華都唔支持佔中,民主派卻選擇支持對方,明顯屬雙重標準。
有民主派中人指,佢哋表面上有約二百張票,但其實大部分人都對今次人大選舉缺乏興趣,估計最後只會有數十人去投票,難以左右大局,依家呢份推薦名單又引起爭議,根本係庸人自擾、自取其辱。